اون بئش یاشیندایدیم او گونلر

دووشان اوره یی تک اورکک

قاپیلاری دؤیوب قاچیردیم
دوستوم اومودلا بیرلیکده...
عادَتن توتاردیرلار امودو
دؤیردیرلر
کؤکلویوندن قاچا بیلمه دییی اوچون
سن بیزه باخیردین بیر تبریز آذانی تک
باتلاق دوزه لدردیم چاغموردان
باتیریب و آغلاتماغا
قونشولارین فاغیر اوشاق لارینی.
و سونرا گوله ردیم اونلارین آغلاماسیندان
سن اورادایدین
شئیطانسی آجیمازسیزلیغیمدا
سحرلر یولونو گوزلردیم
کؤهنه چی عمینین
باشماقلاریمی وئریبده
قیرمیزی جوجه لر آلاردیم!
اونلاری اؤزوموزدن چوخ سئوردیک
دوغروسو بیر شئیلر آنلامادیم
اونلار نه دن بیرگوندن آرتیق یاشامازدیلار؟
یاس توتاردیم
آغلایاردیم ایچین–ایچین
سن منه باخاردین
اینجه اوره ییمین کؤوره یییندن
آخشاملاری ناغیل دینله ردیک آنامیزدان
آتاملا ائولنمه لرینین شیرین اؤیکوسونو
گلین کؤچمه سینی
فایطونلا بو تبریز خیاوانلاریندا
و سونرا قابار چالاردیم
ایشچی آتامین سنگک قوخویان اللرینده
قایساقلاناردیم اوره یینده
سن منه باخیردین آجی یوخسوللوغوموزدان
کیچیک ائویمیزین اوزَرلیک قوخویان ایستیلیییندن
بیر آز بؤیوموشدوم داها
هر کس دن گؤزَل گئیینمه یی ایسته ردیم
یاغلی ساچلاریملا
و منی آنامدان بئله اوتاندیران
ایلک دفه ووردوغوم بوغلاریملا
قیش سحرلری
اووخالایاراق اللریمی
قیز مکتبلرینین اؤنونده
سن بوتون قیزلارین گولومسه مه سیندن
مکتب مینی بوس لاریندان
هله ان چوخ قورخدوغوم پولیس ماشینیندان؛
منه باخیردین
من ایسه بیریسینی آختاریردیم؛
هئچ بیر زامان گؤرمه دیییم بیریسینی
. . .
بیزی هله ده
بوتون نیسگیللریمیزین یانیندا
یاشادیردی
تراکتور دئیه بیراومود
- :"گؤزونو یئدیییم
آل کؤینکلی تراکتوروم
هئچ اونوتمام
بیر هفته اؤنجه دن حاضیرلانمیشدیق
اویونو آلقیشلاماغا
اوزو قارا اولسون یوخسوللوغون
میللت قاپیدان گیررَکن ایستادییوما
بیز دوواردان آشاردیق
اویونو قازاناندا "قوجامان تراکتوروموز"
سانکی یئنیدن دوغولاردیق
سن اورادایدین
منه باخیردین
بوتون ایزله ییجیلرین سئوینج "یاشا"لاریندا
زامان اؤتوردو
.
بؤیویوردوم دورمادان هر گون
آینادا اؤزومو اؤزوم بئله تانیمیردیم!
داها ان چوخ پولئتیک کیتاب لارا
و عوصیان شئعیرلرینه یاناشیردیم!
آیاغیم قهوه خانا گؤروشلرینه
و وطندن ایسه دانیشیلان هر یئره
وورغونجاسینا چکیلیردی
"آزادلیق" و "یاوانلیق" ؛
منی اؤزومه جومدوران تک شئی ایدی
گئجه لراوره ییمی دووارلارا
گوندوزلر شئعیرلره یازاردیم
اونوتمارام؛
بیر گون
اسیردیک ایسلاق سؤیود آغاجلاری تک خیاواندا
داشلار بئله تیتره ییردی
آچیلان قورشون سسلریندن
تبریز اود توتموشدو اوره ییمده
اورهکلر یانیردی تبریزده
قان تَر ایچینده اوره کلر
بیریسینی چارپاییدا آپاریردیلار
تانیش بیریسینی
ایللرجه گؤرمه دیییم بیریسینی
اونو آرخادان وورموشدو قودوزلار
"اومود"
آناسینین سون بئشییینی
اوشاق لیغیمین بیر پارچاسینی
یاشلی آتاسینین سون "اومود"ونو
محله قیزلارینین سئویملیسینی
...
سن اورادایدین...
اونون سونونجو دفه چیرپینان اوره یینده
اوی
سنی اوتوردوم
ایلک دفه پولیس ماشینیندا
گؤزلریم باغلاندی
اؤپدون کلفچه دوداقلارینلا بیلکلریمی
سنی آتدیملادیم
زیندان سسسیزلییینده
دیرناقلاریملا قازدیم دووارلارا
 سن" شئعیریمی
سؤیولدوم
دؤیولدوم
سنله اؤپولدوم
سنی منده چاغیردی
سحر واختی بیر عسگر
بلکه ده بیر آزدان گؤرمه یه جکسن
هئچ بیر زامان
دومان آدلی بیریسینی